Balantayan
Balantayan sa Dominggo (Jan. 24) ang mangin hulag sang mga politiko kag opisyal sang siyudad sa Freedom Grandstand karon nga nagsipak na sang dalan kanday Mayor Jerry Treñas kag anay Justice Secretary Raul Gonzalez Sr. Magapakita ayhan sa Freedom Grandstand ang mga Gonzalez katulad sang nagliligad nga mga tuig nga paghiwat sang Dinagyang? Sin-o naman ayhan ang opisyal sang siyudad nga maga-reklamo nga wala malawagan ukon masapakan?
Political materials
Kadungan sang pagdagsa sang mga streamers ukon karatula sang mga produkto kag commercial establishments sini nga Dinagyang ang pagdagsa man sang mga tarpaulin sang mga kandidato lokal kag nasyunal. Bisan anhon pa sang city government indi gid mapunggan ang pagpanapik sang mga streamers kag tarpaulin sang mga politiko nga naga take advantage sang selebrasyon sang Dinagyang agud ma-display ang ila mga itsura kag ngalan. Kuntani pagtapos sang Dinagyang celebration sa Lunes maubos man kaladula ang mga streamer sang politiko nga nagapahigku sang atun siyudad.
Peace covenant
Sa siyudad sang Bacolod kag probinsya sang Negros Occidental naglagda na sang peace covenant ang nagkalain-lain nga mga politiko para sa nagahilapit nga eleksyon sa pagpanguna sang simbahan kag sang mga civic organizations. Diri sa siyudad kag probinsya sang Iloilo wala pa gid ni isa ka peace covenant nga natigayon. Nagapakita lamang bala ini nga malinong ang magkasumpong nga mga politiko diri? Ukon wala lang sang may nagpasimuno agud matigayon ang peace covenant?
